И.С.Жараев аатынан СӨ норуоттарын аудиовизуальнай нэһилиэстибэ национальнай киинигэр 130-ча пуонда баар. Бу киирэр матырыйааллары тэрилтэлэр, биирдиилэн устар студиялар эрэ буолбакка, Саха Сирин биллэр дьиэ-кэргэн ийэлэрэ, аҕалара, оҕолоро, сиэннэрэ эмиэ туттараллар.
Холобура, быйыл туттурдылар: Курилова Ладина Гаврильевна, аҕата Гаврил Николаевич Курилов – Улуро Адо Аллараа Халыма юкагирдарын култууратын тарҕатааччы., гуманитарнай чинчийиилэр уонна хоту аҕыйах ахсааннаах норуоттар кыһалҕаларын үөрэтэр институт учуонайа – лингвист, туһунан аудиовидео матырыйаалы, аны биллэр тележурналист Руслан Валерьевич Очиров эһээтэ Үөһэ Бүлүү Ботулуутуттан төрүттээх, Саха көрдөрөр – иһитиннэрэр хампаанньа араадьыйаҕа уонна телевиенияҕа салаатыгар “Геван” биэрии эрэдээктэринэн үлэлээбит поэт, суруйааччы Степан Егорович Дадаскинов уһулан хаалларбыт 16 мм киинэ пленкаларын аҕалан үйэтиттэ. Маны сэргэ, 1976 сыллаахха ыытылыбыт Сэбиэскэй сойуус Олимпиада үрүҥ көмүс призера Александр Николаевич Иванов дьиэ-кэргэнин, үлэтин, спортка бэлиэ түгэннэрин көрдөрөр видео устуулара биһиги тэрилтэбитигэр анал пуондаланна.
Чурапчы улууһун Мугудайыгар өр кэмҥэ култуура сынньалаҥ дьиэтин директорынан үлэлээбит Лаврентьев ВладимирМихайлович, СӨ култууратын туйгуна, кини общественнай араас тэрээһиннэри “Чөл олох” “эр дьон” түмсүүлэрин көҕүлээччитэ этэ. 1990 сыллартан видео, DVD кассеталарга устан хаалларбыт тыа сирин олоҕун — дьаһаҕын көрдөрөр түгэннэрин, кыыһа Светлана Владимировна Диодорова-Лаврентьева туттара сылдьар.
Пуондаҕа киирбит матырыйааллар сыллата эбиллэ туруохтаахтар. Ол курдук, “Хотугу слус” телерадиоакадемия сүрүн эрэдээктэрэ Татьяна Афанасьевна Гоголева 1989 сылтан саҕалаан бу күҥҥэ диэри өрөспүүбүлүкэ олоҕун – дьаһаҕын көрдөрөр видео устуулара киирэ тураллар. Онно киирбиттэрэ “Семья года ”, “Азия оҕолоро” юнкордар үлэлэрэ уонна да араас элбэх биэриилэр. Сэрии кэмин, Чурапчы көһүүтүн, элбэх харах уулаах ахтыылары сэрии, үлэ бэтэрээннэриттэн устан үйэтиппит дьонтон биирдэстэрэ биллэр тележурналист Иннокентий Михайлович Слепцов үлэлэрэ эмиэ бааллар. Манна кини дьиэ- кэргэнин, оҕолорун тустарынан баай пуонда көрүллэр.
Дьиэ — кэргэн норуот туллар тутааҕа, тулхадыйбат тутулуга буолар. Бүгүн аан дойдутааҕы дьиэ- кэргэн күнүнэн бука барыгытын эҕэрдэлиибит!
Марина Винокурова
